Sa avčij ıxha. Manģun do Ajdemir ıxha. Mana gejr hïrs va insaf dešda insan ıxha. Kʼonaqa üqqänģa, manģve žukvasana avčeršina qʼočʼe aljabatʼa vuxha. Kʼonaršini bölikeqar qihna girxhujnģä manģve qʼočʼe njaajij givxhu maaʼab havajsarnanij. Gojne mančilqa, qʼočʼejlqa, aljabtʼas hajkʼan ıxha deš. Amır hivu qootʼal vuxha. Qʼočʼe čiljeb alqa qidääva, gulljebı mančilqa ajhe ıxha.
Ajdemir jaralamišavʼujni kʼonasaqa djeljes qixha givkʼasse zalumijvallikva cʼebba gjootananij. Agar kʼon harajkva kujilejqa djugulivxhe avarqʼıl’, Ajdemiree ulabbı mančin kʼontʼanče alqaʼa ıxha. Ajdemir mäxürna insaf dešda žod insan ıxha.
Sa eljes näxürmı Ajdemir mer avčijvallis safarejqa qiğečʼe. Manģukʼle kʼonaršin sjurij ģeže. Mančisaqa deles qixha, atıšaʼa gijğal. Ģatarejdın pʼatʼrombı taamxhes mejga inģve kʼonaršilqa ajhe. Anžax manģve avhijni gulljebišikje sažab kʼonaršis qidivijxhar.
Man jiğ uğad dešin ıxhajqa gora, mana čoljejʼar kujilje xämdijs axva. Exhalijs kujiljejqa žagvaran mučʼrubınan qʼäsinbı sää givijğal, anžax manbišdi sanģvežab Ajdemirıs ne salam hidjoolje nejib manģukva ixtiljet hidjaʼa. Äxrejʼar kujiljeqa žehilj insan ečʼe va qʼäsinbiše salam hoolje.
Salam qivšu inbiše qijghan:
“Njaʼas ğu qarı kʼonaršin sjurij tekda hassır?”
Žehiljee žavab qeli:
“Ģijna sa äkʼel’dešda bejnjavajij avčijvallis arı. Manģve kʼonaršilqa atıš haʼanģä zı jizın dal gullebišdi ögejqa adqı. Dal tika-tikana dağılmišxha mančiqa gora zı qarına.”
Qʼäsinbiše žehilikje qijghan:
“Akkas havaa näxübij?”
Manģve žavab qele:
“Čis näxübnajij vukkan, hämaxübna vob.”
Ajdemir öörxäs däxï, ävaraj haaʼa:
“Čis näxübnajij vukkan, hämaxübna vob!.. Man hižo ejhen žavabnje vodun? Šokʼle ģeže diše akkas mıkʼan ajazod?”
Manģun žuvabbı kujileni žagvarani mučʼrubınani qʼäsinbiše ärsakj hidjaʼa.
Hïrs Ajdemir njakʼ haʼas ģilexha. Mičʼejr muğur qixhajnģä, ģeže vuž sa suvaljor axu, žuna tifang mebni suvaljob avxu.
Ajdemir gejbni dağamijvallikva xaaqa ajkʼan, mäkkamra čʼırı qaʼa. Mani jiğılje qijğa sajir mana avčijvalis kʼonaqa harkʼın deš.
Jiqbišin foljklor
Comments
Post a Comment