Njaganijij Ģïje

Sa verığnani jiğılj Njaganij čini akkani ögijlj xulabbı vuxhnjelqa gidxhı iljobzur vuxha mäʼnij hookʼa. Mäʼnij hookʼamaa fıkırramiš vuxha: “Äljhääs zı čoljejqa xhıjiqa iljaakas jizdi Xhunašše-njaganijn jišin balabı äjxäränģä. Čoljejqab häsil vuxhjes xaaqa qavaljes.” Jäqqa Njaganijsqa Ģïje qizaaxı, manab čoljejqa čini kalamıqa iljaakas äljhää vuxha. Njaganijkʼlje Ģïje ģavžu ejhen: 

“Hürmatnana Ģïje, näxübnje?” 

Ģïjeb amma gjejb ötkamnana vuxha. Hürmatıkva salam hivljesdi žigej sadžu vukʼulj ģoobxhur ejhen: “Hižonje ğu Njaganij inäxüb čakba čoljej tʼabaljaʼa?” Njaganijn ejhen: “Zı ivijkaras qiğivčʼu. 

“Ivijkaras?” Ģïjejn äqänajkva qijghan. “Amma mäxdüni žitʼani ģjelbišikva äqʼänjejqa älhääs deš.” 

Ini žuvabbišikje Njaganij cimis qivxha. Mančis qʼabılj exhi ıxha deš čini ģel‘bišdi häkʼej mäxdün žuvabbı ejhenģä. 

“Ğu fıkırramiš vooxhi jiğın, ģïjejn, ģeljbı jizınčilje ekʼda, jugda ģadajxhvan?” mančin Ģïjejkje qijghan. 

“Hoʼo.” Ģïjejn ejhen. 

“Vas vukkan dišde zakva sana ģadaxhvanas, nenaje hiqa qivxhjes?” Njaganijn qijghan. 

“Vakva sana?” Ģïjejn ejhen. “Zas äqäna qalja himaʼa. Ğu jiğni žitʼani ģeljbišikva zalje hiqanje qivxhjes?” 

“Vakʼlje ģažesın zı hiqa qivxhjes.” Njaganijn ejhen. 

“Dora ģadaxhvanas.” Ģïjejn ejhen. 

“Gozjet heeʼe. Cʼebba zı xaaqa äljhääs mičʼädijn kar oxhanas, sa sura säʼätılje hajnjaqa savkʼalasda, ejxhi?” Njaganijn ejhen.

“Ejxhi.” Ģïjejn ejhen.

Njaganij xaaqa habkʼın. Äljhää ljetti fıkırramiš vooxhi: “Ģïje zalje ekʼba ģadaaxhvanna, amma mana sa-kʼılba vuhnucʼba, zı mančis ämäl haʼas.” Njaganij xaaqa qabı xhunaššejkʼlje ejhen: “Ģarij, ekʼba karbı aljeʼe zakva sana vüqqäs givxhas.” 

“Hižonje ıxha?” Xhunašše-njaganijn ejhen. 

“Ši Ģïjejkva  hïdžat haʼu nenaje ekʼba ģadaaxhvanna: zınje dešxhje mananje? Zas Ģïjejlje hiqa qivxhjes vukkan, ğu zas mani išej kumag haʼas.” 

“Ğu xarabbanje?” Xhunašše-njaganijn qijghan. “Njaqanje ğu Ģïjejkva bäs haʼa? Mana valje ekʼbažab hiqa qivxhjesda.”

“Mana jizda iš vobna. Karbı aljeʼe, dora. Zakʼlje acʼan hižoje zı haʼa.” Njaganijn ejhen.

Xhunašše-njaganijn karbı aljaʼu Njaganijkva sana čoljejqa habkʼın. Jäqqa Njaganijn xhunaššejkʼlje ejhen: “Ši Ģïjejkva sana ini xılijni čolılje ģadaxhvanas. Ģïje sa gorılje, zı mansa gorılje ģadaaxhvanas. Ğu amma čoljejni äxrej jizdi gorısana iljoozure. Ģïje hibxhırmaa ğu ekʼba häraj heʼe “zı injaa vobna!”. Bašda vuxhananje?”

“Bašda vuxhana.” Xhunašše-njaganijn ejhen.

Mäxüd mančiše haʼu. Njaganij čini gorni äxrjejqa xhunaššejkva sana habkʼın, mana maa ģaljebču sabkʼılna. 

“Hižonje, ģadajxhvananbınje?” Ģïjejn ejhen.

“Dora.” Njaganijn ejhen.

Haarna čini gorısana iljobzur.

“Sadlje, qʼödlje, xhjebıdlje!” Ģïjejn ejhen. 

Qʼöjib sana ģadabxhunna. Xhjebıdlje-joqʼublje pače haʼu Njaganij čini žigajlqa sabkʼıl givʼurna. Givʼur tavsun haʼa. Amma Ģïje ģadaaxhvan vuxha. Čini gorni äxrejqa hivijxharmaa Xhunašše-njaganijn häraj haʼa: “Zı injaa vobna!” Ejhes ıkkan Njaganijij njaganijna xhunašše sana-sančik akar ıxha. Ģïje matuvxhana Njaganij čilje hiqa qivxhava. 

“Häšde jïqʼalqa dora ģadaxhvanas.” mančikʼlje ejhen. “Sadlje, qʼödlje, xhjebıdlje!”

Ģadabxhunna jïqʼalqa Ģïje haljeb ekʼba. Xhunašše-njaganij čini žigajlj avxuna. Ģïje gorni qʼomaqa hivijxharmaa Njaganij häraj haʼa: “Zı injaa vobna!”. Ģïje haljeb matuvxhana. 

“Dora sa jäqqej ģadaxhvanas.”  mančin njaganijkʼlje ejhen. 

“Ejxhi.” Njaganijn ejhen. “Vukkanxhjee sa jäqqejb ģadaxhvanas.”

Med ģadadxhun. Mäxüd jighcʼalje xhjebni jäqqej Ģïje injaqa-šaqa ģadabxhun. Amma Njaganij hiqa qooxhje vuxha. Ģïje gorni qʼomaqa hivijxharmaa Njaganijn ejhen: “Zı injaa vobna!”. Ģïje gorni äxrjejqa hivijxharmaa Njaganijn xhunašše ejhen: “Zı injaa vobna!”. Jighcʼalje joqʼudʼesdi jäqqej Ģïje čolni jïqʼnjejqa hibxhırmaa akkibkʼılna, sajib ïğıvkaras dävxüna. 

“Obzurna.” ejhen. “Dešob växä ģadaaxhvanas.”

“Häšde ģažujnnje nenčiqadee ģeljbı zarda?” Njaganijn ejhen. 

Qobtʼul čina xhunašše adkʼınijnbı xaaqa. Manbı hidjatʼuxhjee haljed ješemiš exhi ixhjes.

Grim čuba.