Abramıj Ansar

Sa xivejʼab ģonšuvalljej žuhütʼ Abram va musulmanij Ansar ješemiš vooxhe vuxha. Ansar xäbba ušağaarnana kasib ıxha. Abram xärna alverčij, var-devletnana insan ıxha. Ansarıqad sa gelir qään sanaʼätıd ıxha deš. Malakje sa zerij balkan vuxha. Balkanıkva kirabı hadqı sa tahärıkva xizan gudmiš haaʼa vuxha. Sa jiğılj Ansaree inäxür aqʼubej azabej nimejnje gudmišxhes žulqa žad sual hivo. Qijğa ģonšu Abramısqa üqqäs, manģvee belkje sa jäq qäb qaaʼava qʼararılqa qarı. Gırgın žanejdınbı ģonšu Abramısqa jušen haʼanbı.

Abramee diqqatukva kʼırı gjaqqı ejhen:

"Ģonšu acʼannje vakʼlje Turkijejlj süvän ģekvabı gejd gıranni qʼijmatıs älhää vodunbı. Ğu süväbišin ģekvabı ališšu Stanbulqa hakʼnje. Manbı massa hivoje vas xädın ģazanž ixhes."

Ansaree borž-xarž haʼu haarın 5-ni mantakje 500 ģekva ališšu Stanbulqa hajkʼan. Maaʼar sanģus mihman ejxhe. Šenisani jiğılʼ Ansar sabara ģekvabı aljatʼu bazarejqa qiğečʼena. Bazarej har qarı ģekvabišiqa iljakkına äqäna haʼu ötmiš ejxhi älhää ıxha. Ansar xhebıdlje jiğna ģekvabı aljatʼu mičʼär bazarejqa arajli exhalqamej giʼur sažad massa hidjovu jïqʼalqa sijkʼal ıxha. Inģus ģonšu Abramee vuž aldamıš haʼuva šak qabı.

Stanbulni šaharej Ansarıs mihman ıxhana Merdan gejr äkʼelnana insan ıxha. Manģvee ejhen:

"Ansar, mihman, jišda paččah gejr äkʼelnana, rahïmnana insan vorna. Ğu manģusqa ähvalat vuxhana xhinne jušen heeʼe manģvee vas sa jäq haagvasda."

Ansar paččahısqa harkʼın žukʼ ıxhajnčina xabar haaʼa. Paččahee ejhen:

"Ansar, ğu qʼödlje jiğna dinž aljetʼe tavsun heʼe. Xhebıdʼesdi jiğıl’ ģekvabı aljatʼu bazarejqa hakʼnje. Amma sa ģekva 100-ni mantalje užuzda himeli. Jiğın ģekvabı tarašxhesınbı."

Ansaree sağol-varol ivho qiğečʼena. Amma šaklamıšır ejxhe ejhen: mäxübna qʼismat zaqab vooxhej.

Paččahee amır ookʼan: sa ülžumni arajl Stanbul šaharej ješemiš vooxheni žuhütʼaaršini pʼaltʼumbišiqad süväni ģekvan jaxabı dexhej šaharenče ģehivšesınbı. Mana amır šaharni kučebišejqa, bazarbišejqa atʼiqʼan haaʼana. 

Paččahna amır qäbqï žuhütʼaar ala-žalje abakʼa. Bazarbišej süvän ģekvabı tʼabalj haʼa idjaaki hižoomı haʼas dacʼa mahättal vuxha avxujnbı. Xebıdʼesdi jiğılj meb žuhutʼaar süpukje bazarej ivijkar vuxha. Iljaakanbı massa heljen süvän ģekvabı vod. Inbišee qidghın haʼan:

"Xhuljesnje ģekvabı massa heli?"

Ansaree ejhen: 

"Ģekvabišin sa 100-ni mantasodun." 

Sa žuhütʼee Ansarısanadın 20-lje ģekva ališšu vuže ģirağılj 200-ni mantas heli ıxha. Man Ansarıkʼlje ģežen. Ansar ekʼra xaaqa qarı mihman Merdanıs mančina xabar haaʼana. Merdanee ejhen:

"Acʼannje, Ansar, häšde gırgın ģekvabı saʼu bazarejqa ıkkejs massa hiljes zınad kumag haʼasın. İnbiše 480-lj ģekva fajtonejqa saʼu bazarejqa ıkkejka. Šeni 20-lje ģekva ališšujni žuhütʼee ejhen:

"Zı gırgın ģekvabı haarın 100-ni mantakje ališšjesınbı."

Ansarni mihmanee ejhen:

"Ši ģekvabı sažigej helje deš, tekda-tekda heljes. Jižbıd haarın 250-ni mantas vodun, ıkkanxhe ališše."

Sura saʼätni arej ģekvabı taraš ıxha ajkʼananbı. Sabaranbišis hidxhır deš.

Sa ülžum ģadijnģä man ģekvabı dexhajnbı šaharenče ģohoši gibğıl. Žona sajir Ansarna ģonšu Abramna čož ıxha. Manģvee qarı čožus gaf haaʼana.

Ansaree 2000 manat pılna mihman Merdanıs (vužje ildjabatʼa) gužun hivo. Sağol- varol ivho, Ansar xaaqa qarı. Ansar ģonšu Abramıljer hexxara varlamıš ıxha. 

Jiqbišin foljklor