Kʼılna Maččarij

Čʼalaga gırgıda šitʼjaar sažigejqa sadı.

"Šas xäbna vukkan." Bogragajn mančikʼlje ejhen. "Gırgıni häjvanaaršiqab xäbna vobna, mančikje šaqabıb vuxhes vukkan." 

Gırgıda šitʼjaar hekʼva, čin xılibı ïxijxä gidğıl.

"Haššuje mana vuxhes?" Kʼılna Cʼablana Maččarij hookʼu xılibı ïxï. 

"Mudrikna, äkʼeljnana šitʼ." Bogragajn ejhe.

"Mižagna šitʼ." Tʼavusun ejhe.

"Jušenaaʼana šitʼ." Tutuģušujn ejhe.

"Ittuba hookʼvana šitʼ." Zırlıngajn ejhe.

"Kʼuxh ïxijxäna šitʼ." Tʼaqʼtʼaqʼajn ejhe. 

"Kʼarna vusunnana šitʼ." Qänan ejhe. 

"Žagvarana vusunnana šitʼ." Qïnerkejn ejhe.

"Nekkje važibın axtıba iljooxij..." Lïqʼan joqʼ suralqa iljaakı ejhe.

“Ši jarıš haʼas, nekke axtıvalljejqa iljooxana šitʼ šitʼjaaršda paččah vuxhes…” Lïqʼan xılibı ïxijxä ejhe.

Xädda čʼiv-čʼijbıjlje qijğa razxhajnbı qihnijni jiğılj jarıš haʼas. 

Kʼılna Maččarij fıkırramišooxhe.

“Ši gırgıda jugda iljedaxa, ši gırgıda jugda hekʼva… amma šakʼlje acʼan lïqʼ xäbna, gužnana vobna, mana ģamuvxhesda.”

Amma Kʼılna Maččarij injammišooxhe deš nekke xäbna hämmaše nekke jugna vooxhe.

Qihnijni jiğılj gırgıda šitʼjaar jarıš haʼasdimej sažigejqa sadı.

Maa xädda čʼiv-čʼijbı, qʼar-qʼarbı ıxha. Kʼılni Maččarijn javašba sa mäʼnij hookʼva čiljeb alqa.

Gırgıda šitʼjaar čʼalaga nekke xädni jivni äčelj geedxu.

Bogragajn ejhe: “Musaje zı uu-uu ivho manke šu gırgıda šosse äxäni axtıvalljejqa aljedxe.”

“Sa, qʼöd – uu-uu!”

Bogragajn cʼir haʼu.

Gırgıdabı alidxı.

Alidxı gırgıda axtıvalljejqa.

Axtıjni jivaaršilje uğaqa.

Uğaqa gımıljbišisqa…

Sa sančilje qijğa gırgıda javašedxha.

“Gejd axtıda.” Qïnerkejn ejhe.

“Zı vuxhana.” Qänan ejhe.

Manke sa Lïqʼ avxu… haljeb axtıvalljejqa iljooxa.

Amma Lïqʼıkʼlje čini vusunni ärej djuguljuvxhana Kʼılna Maččarij ģavžu deš.

Lïqʼ alivxu javašivxhajinģä cʼir haʼu: “Zı ģamuvxha!”

Kʼılna Maččarij djuguljuvxhajni žigejnčje qiğivčʼu sa-kʼılbab axtıba alivxu… 

Šitʼjaarše ejhen.

“Kʼılna Maččarij ģamuvxha!”

“Kʼılna Maččarij paččah vobna!”

Amma Lïqʼijni xädni šitʼjaarše qäl vuxha ejhen: “Lïqʼ xäbna vobna, Lïqʼ gužnana vobna, mana nekke axtıba iljooxa. Kʼılna Maččarijn ämäl haʼu.”

Bogragajn čalıšmišvuxha manbı sakitaʼas.

“Hižoje jugda? Ģamuvxhaj ğu gužnanava dešxhe ģamuvxhaj ğu äkʼeljnanava?”

Nenižab šitʼikʼlje žavab acʼa ıxha deš.