Paččahij ušağ

Avala zamana sa paččah kandčijni paltarej xivaaršej ijkar, žuni ölkajni xalqʼın ješajiš joxlamıš haʼa ıxha. Sa xivejqa hijxharanģä paččahıs xivuna juzbašij ģažes ıkkijkan. Xivuni ģirağılj hivaagani ušağaaršike qidghın haʼa ejhen:

“Aj ušağaar, vušdi xivej siftara mihman šavanje ģaršilamiš haʼana?” 

Ušağaar ses dena iljaaka aaxva, amma sa ušağ hiqa horhur ejhen: 

“Mihman siftara jišdi xivuni Merdan dajijni xvaan ģaršilamiš haʼa, gejb jamanna kar vobna”.

Paččah fıkırramišxha med qijghan:

“Bes vušdi xivej dojukvana xärna haššunje vorna?”

Ušağ:

“Mihman, jišdi xivej dojukvana Uruž dajijna xäbna boğa vobna, mančilje ģamijna mebna dešda.”

Paččah:

“Zı qodkuda dešodde qidghın haʼa.” Mer šeni ušağılqa sakʼı ejhe: “Bes xivuna xärna haššunje vorna?”

Ušağ:

“Mihman, jišdi xivuna xärna Muxtar dajij vorna, manģulje axtına, xärna merna dešda.”

Paččah:

“Bes vušdi xivej xärna, žamaʼätıs maslahät ģoožjena haššunje vorna?”

Ušağ:

“Mihman, jišdi xivej žamaʼätıs maslahät ģoožena 125-i ješejna qʼäsda Harın didjej vorna.”

Paččah češmišxhažar axva. Fıkrejqa qää deški qijghanas xivuna juzbašij haššunjeva. Amma ušağ paččahıs qʼabılj ejxhi ušağni xıljeqa 5-ni mantena ģizil hooli.

Ušağ:

“Mihman, man pıl jiğnižad žibejqa kʼejxhe, zas ıkkan deš. Dak’ jed’ zakva aldaaxhvanasınbı.

Paččah:

“Dakkikʼlje, jedikʼlje ivhe pıl paččahe hivo.”

Ušağ:

“Mančiqa dakkje, jedje kullježad injam haʼas deš, ehesın paččah mäxürna qʼïtʼmır deš ejxhena xut-xuruš heljes.” 

Paččah:

“Xıdıl, zı vušda mihman vorna, ögejqa gixhe, dora xaaqa.”

Ušağ ögej xaaqa qavajli, xaani ejse šadra mihman qʼabıl haʼa, växäna hürmat haaʼa. Mihmanje vuž paččah ıxhaj acʼalj alikkı ejhe:

“Vušda dix zas jikʼejnče qʼabıl ıxha. Manģukje gejd acʼalnana, jugna vazir ixhes, mana zasqa hilje xär qaʼas, gojnje zas vazirna täʼin haʼas”.

Ušağna dak razxha, 10-ješena dix paččahısqa hivo. Paččahee mana žuna žanana dix xhinne xär qaʼu, qädqä haʼu, gojnje vazirna gixhxhı. Häkʼerar manģukje gejr äkʼeljnana, acʼaljnana, bašara-bujruğ haʼas, iš aširmiš haʼas växäna vazir ıxha.

Jiqbišin foljklor